أخبار الجو و الأمطار و العج وكل شي ينشاف في السماء + تنبيه مهم بالرد 729#

السالفة و ما فيها إن هالموضوع بيصير مخصص لأخبار الطقس و
الجو من كل مكان.. الموضوع موضوعكم و أنا منيب متدخل إلا في الشديد التسايد
<< الي يسمعك يقول إنك أنت الي تنزل المطر الحين استغفر الله!!..
أنتم ماشاء الله ذر وشكثركم وكل واحد منكم من ديرة..
القويعية / شقراء / سدير / الغاط / القصيم / تبوك / النماص / جيزان /
المدينة / جدة / الخبر / الباحة / بلجرشي / الخ

وحنا الحين في موسم نتوقع فيه خير.. وبيصير هالموضوع مخصص للكلام عن هالأشياء
أي شي يصير في دياركم علمونا وحدثوا الموضوع.. لأن هالموضوع منكم وإليكم عاد مهوب منكم وإليكم يجي أحد يحط مشكلة يقول ساعدوني..



وشسمه الي أوله شرط آخره نور.. ركزوا معي عشان لا ينحذف لك رد أو نهوش عليك أو تخمنا و نكلبشك:

1- الردود للأخبار الي صارت بس.. مهوب تقول تتوقعون بكرة مطر؟!.

2- التعليقات الجانبية تجيب لنا مر و لا نحبها.. نبي أخبار وتعليقات إضافية تضيف للخبر. يعني ردود واااو مطر نااايس بلاش منها

3- لو حصل صور للتدعيم كان يا سلام أزين شي: عج/ مطر/ برد الخ

4- الموضوع مهوب لأخبار المكشات.. فيه منتدى السياحة بربسوا فيذاك وحطوا صور زواليكم وقدوركم.

5- بلاش إشاعات رجاءً لحد يقول نزل مطر وهو ما نزل ترى هالأخبار تخلينا نشاوف ونتحمس ثم نتحطم

6- ياليت الدقة في الخبر،، يعني الي يكتب لنا خبر من حفر
الباطن مثلاً يعطينا التفاصيل وافية إنها أمطرت الساعة الفلانية للساعة
الفلانية وكيف كان الجو و البرودة.. يعني خل خبرك الي تنقله و تجيبه وافي و
شامل قدر الإمكان.

7- ما شفت شي أو كنت نايم مهوب لازم تسرق أخبار من منتدى
ثاني وتجيبها لنا عادي حنا راضين بقضاء الله وقدره.. نحب الأخبار تكون طازة
من مصادرها..

8- يمنع النقل من اي موقع اخر مهما كان الا مواقع الطقس الرسمية مثل bbc weather واللي في مستواها
إذا تذكرنا شروط إضافية نتسلط فيها عليكم بنكتبها